فوجئت لما حبيت أرشح نفسي في مجلس إدارة جمعية موجودة في الحي بتاعي ان إدارة التضامن الاجتماعي بالبساتين ودار السلام ترفض ترشيحي وبتقول ان القرار دة بناء علي كتاب الإدارة العامة للأمن وهما يقصدوا طبعا امن الدولة.
ليه امن الدولة يعترض علي وجودي في مجلس إدارة جمعية لخدمة المجتمع انا مش حرامي ولا مختلس بل علي العكس الحرامية والمختلسين موجودين فعلا علي رأس جمعيات أهلية ومش بس الجمعيات ولكنهم موجودين في الوزارات دخلوا المبيدات المسرطنة وأكياس الدم الملوثة ولا قتلت المئات في عبارات الموت ولا كنت سبب في قتل المئات في القطارات ولا غيرها من امور كانت سبب في موت ناس غلابة ميقدروش يتعالجوا في أوربا او أمريكا ولا بيقضوا رحلاتهم بطائرات رجال الأعمال!
أنا معارض نعم, وشايف إن الحكومة وقوانينها ضد الفقراء في هذا البلد ولكني مش ارهابي
مش هي دي الحكومة الي واجعة دمغنا ليل نهار بأغنية هابطة اسمها ديمقراطية وتداول سلطة وحاجات كثير كده
الدولة هي الحزب الوطني ولجنة السياسات ورجال الأعمال ومن حولهم من لصوص وبلطجية شفناهم في الاعتداء علي القضاة والصحفيين والمعارضين